ليه تجارب ربنا صعبه؟

تقريبا مفيش حد فينا ممرش بوقت صعب او مؤلم- وقت حس فيه انه لوحده ومحدش حاسس بيه- وقت عمر ف مافي حاجه فل دنيا قدرته تعالج جروحه او تداويه- طبعا احنا بنختلف من شخص لل تاني علي حسب تجاربه وعلي حسب مدي قدره تحمله ولكننا بنتشابه فحاجه ووهي طريقه مواجهتنا للامور دي وهي بتبقي عن طريق الضعف والخوف واننا نستخبي ونداري 

 طيب هو في تجارب ممكن منعديش منها؟ تجربها ممكن تفضل معلمه فينا العمر كله ؟ فلحقيقه انا مش خبير عشان اقولك اه اولا-بس اللي اعرفه ومتاكد منه ولامسه تمام هو ان كل التجارب بتعدي بنبسه كبيره- بعد حين او اخر التجربه هتعدي ووقت الضيق هيروح دا انا امر متاكد منه- دا كان من تجربتي الشخصيه اللي انا صعب الاقي حد مر بظروفها اوتفاصيلها الصعبه- يعني ممكن ناس شافت   شبها بس مظنش ان حد هيمر بنفس الاحداث دي او بصراحه ساعتها هيكون فقري اوي اوي ذي حلاتي كدا 

  بس ايه رايك لو قلتلك اني مبسوط جدا بل تجربه دي؟ رغم ان حياتي كانت ممكن تكون افضل ب كتير وفيها جوانب ايجابيه اكتر لكن الحقيقه انا سعيد بالتجربه دي وبشكر ربنا عليها كل يوم لانها ورتني جانب للحياه انا مكنتش شايفه مش بس كدا دا كمان عرفتني اد ايه انا قوي ومش بتهزم بسهوله لا مش بس كدا دا ضافت لشخصيتي وخليتني حد فريد جدا بما اني مريت بالتجربه الفريده جدا جدا دي

بصراحه الحزن كان طاغي وقتها وافكارالانتحار مكنتش بتفارق راسي بس الحقيقه ربنا مد ايده وضمني للناس الصح اللي يمكن ساعدتني اتعافي حتي لو بطريقه غير مباشره- انا ممنون للتجربه دي وعرفت غرض ربنا منها وحكمته منها- فهمت التجربه بعد  سنين كتير كتير كتير كتير فهمت ان فعلا ورا كل سيول بيظهر  بيظهر فل اخر قوس قزح واتاكدت تماما ان مهما حزنك طال فهو مش ابدي صدقني دا ربنا عمره ما هيسيبك وهيمدلك ايده- مش بس كدا دا ممكن ليه حكمه فكدا انه يوريك سعاده قدام عمرك ما كنت هتحسها او انه يستخدم انك تأثر ف حيات ناس

انت حياتك مش اسواء من حيات حد ساكن فل شارع او حد حرفيا معهوش ياكل- انت حياتك مش اسواء من حد فقد حد عزيز عليه ذي ابوه او امه او حد من اخواته- انت مش اسواء من حد اتولد منغير اب او ام او عمره مشافهم حتي- او اسوأ من حد قرر يبيع نفسه عشان الفلوس- حتي انت ك شخص لو ممرتش بل تجربه لحد دلوقت انا عايزك تبقي مؤمن ومتشدد وعارف ان التجربه ليها نهايه والحزن ليه نهايه وان  التجربه ما هي اللا شئ يخليك اقوي واصلب وعندك قدره تحمل وان اللي هيساعدك انك تعدي اي تجربه مهما كانت درجه صعوبتها هو مدي قربك من ربنا وايمانك بيه ووجود ناس حواليك تساعدك حتي لو ذي مقلتلك فوق بطريقه غير مباشره بس وجود الناس بيفرق وصدقني بتعدي واي حاجه هتعدي دا امر انا متاكد منه تماما

تفتكر في تجربه ممكن تكون اصعب من لما مريم العدرا شافت ابنها يسوع مصلوب قدامها عل صليب؟   

ليه دايما بنشوف ربنا بيخترلنا الوحش؟ ليه دايما بنشوف حياتنا هي الاسوأ؟

سالت نفسي كتير ليه بنشوف دايما حياتنا هي الاصعب والاسوأ والاوحش؟ ليه دايما بقي في شعور بعدم الرضا؟ ليه دايما بقيت احس اني دايما في حاجه ناقصاني؟ ليه دايما حياتنا بقت  الجزء السلبي فيها هو الطاغي؟ لقيت ان جزء كبير من حياتنا مشاكله هتتحل لو السوشيال ميديا قفلت ولا بطلت. للاسف احنا دايما اتعودنا نشوف الاحسن والافضل, دايما الناس بتشير اجمل حاجه عندها افضل شئ عندها مثلا مفيش حد بيشير وهو بيعيط او هو متضايق او هو بيتخانق او عنده مشاكل 

دا خلانا نحس ان بقي الطبيعي ان الحياه تبقي ناعمه وطبيعيه وان حياتنا هي اللي غلط وان بقي طبيعي ان الشخص يبقي انجح حد ومميز اصل اتعودنا نقرأ قصص النجاح اللي بتتشير عل فيس وبعدها نتحسرعلي روحنا

للاسف مفيش حد فينا بيبص علي الجزء المشرق من حياته حتي لو بسيط, هو مش كلام تنميه واقولك بص لنفسك فل مرايه وقول  .  اناقوي عشر مرات والهبل دا- بس الحقيقه اننا ك اشخاص كافيين جدا اننا نقتنع بحياتنا وان اد ايه هي جميله. مش لازم تكون انجح حد او افضل حد فل شله بس كفايه عليك انك بتحاول لانك فعلا تستحق انك تبص لنفسك بصه عظيمه وتكون فخور بيها لانها متستحقش غير كدا- خلينا متفقين القصص الناجحه اللي بتشوفها عل فيس عمرها ما هتبطل والبت الرزله اللي بتتعشي كل يوم برجر ف بافلو وتنزل الصور مع صحابها الجامدين ف ستوري عمرها ما هتبطل- وددا معناه اننا لو مغيرناش الطريقه اللي بنبص بيها لروحنا وللعالم يبقي المعاناه اللي بنعشيها مش هتبطل وهنفضل دايما  متضايقين 

في قصه ظريفه قرتها ف كتاب كانت بتحكي عن عازف مشهور جدا كان ف اشهر فرقه ف عصره- المهم ف ليله من اليلاي وقبل عرضهم لحفله كبيره جدا قررت الفرقه انها تستغني عنه وتطرده- طبعا صاحبنا دا اتضايق بعد فتره وشهور وسنين قدر انه يجمع فرقه من امهرالناس فلوقت دا وعملوا فرقه بلفعل والفرقه دي اتشهرت جدا وانتجوا البومات كتير وارباحهم عدت ال 20 مليون دولار لكن للاسف صاحبنا دا فضل زعلان وحزين وف احدا القائات التلفزيونيه انفجر من العياط لما جت سيرت الفرقه اللي طردته

يا تري ايه السبب؟ السبب انه حط نجاح الفرقه التانيه معيار لنجاحه يعني هو مقدرش ينجح اكتر منهم اذن هو منجحش- - وبماان الفرقه التانيه مبيعتها كانت معديه ال120 مليون جنيه ودا يعتبراضعاف فرقته فهو كان حزين ومكتئب ومتضايق رغم نجاحه الكبير جدا

احنا كذلك لو مرضناش بحياتنا وفعلا اقتنعنا اننا كافيين جدا بدون اي تجميل او اننا نكابر- هنحس فعلا بساعده مش طبيعيه هنحس اد ايه احنا كنا بنجلد ذاتنا علفاضي واد اي ان احنا مش محتاجين اننا نقولللناس بصوا احنا جامدين اذاي عشان نقتنع ان حياتنا حلوه وان اد ايه احنا عطينا اهتمام ومجهود لاشياء بدون داعي وبدون قيمه

بس يا تري احنا ك اشخاص اذاي ممكن نوصل لقمه السعاده دي؟ يعني لو السوشيال ميديا وكل المحبطات اتقفلت- هنبقي سعداء علطول؟ ولا لسا في حاجات تانيه محتاجينها اننا فعلا نبقي فرحانين؟